क्रान्तिची ही अजून एक आशयघन आणि कृष्णमय अशी कविता.मी रचलेली ही चाल कशी वाटतेय पाहा बघू.
सांज-राधा
त्या सांजकोवळ्या उन्हात सजल्या वाटा
गुणगुणती गीते तुझी निरागस लाटा
मावळतीवरती रंग नवे क्षितिजाचे
पाऊल वाजते हलके बकुळफुलांचे
माडांच्या छाया झुलती वार्यासंगे
जणु कृष्णसख्याचा रास आगळा रंगे
आसमंत भारित सूर मुरलीचे आले
कालिंदीचे जल थबके, कदम्ब डोले
तो मऊ मुलायम स्पर्श मयुरपंखांचा
दरवळतो हलका भास मधुर गंधाचा
या चराचराला जडली त्याची बाधा
श्रीरंग घन निळा, सांज सोनुली राधा
कवयित्री: क्रान्ति
ही चाल ऐका.
कोणत्याही टिप्पण्या नाहीत:
टिप्पणी पोस्ट करा