सुस्वागतम्! नमस्कार मंडळी! "त्यांची कविता माझे गाणे" हा एक एक नवीन प्रयोग आपल्यासमोर सादर करत आहे.महाजालावरील काही कवी/कवयित्रींच्या कविता मला आवडल्या आणि मी त्यांना माझ्या कुवतीप्रमाणे चाली लावून माझ्याच आवाजात ध्वनीमुद्रित केलेल्या आहेत. या इथे तुम्हाला मूळ कविता वाचता येतील आणि त्याच बरोबर त्यांच्या चालीही ऐकता येतील. आपण इथे आल्याबद्दल मन:पूर्वक धन्यवाद! आपल्याकडून स्पष्ट आणि परखड मतांची अपेक्षा आहे ज्यामुळे मला इथे सुधारणा करता येतील. आपल्या मार्गदर्शनाचा फायदा घेण्यास मी उत्सुक आहे.
मी लावलेल्या चाली जर कुणाला वापराव्याश्या वाटल्या तर त्या कुणीही खुशाल वापरू शकतं...त्यासाठी माझ्या परवानगीची गरज नाही...
मात्र, इथल्या कविता वापरायच्या असतील तर संबंधित कवी/कवयित्रींची वैयक्तिक परवानगी घ्यावी लागेल हे कृपया लक्षात असू द्या ! अन्यथा ती चोरी ठरेल.

बुधवार, १९ ऑगस्ट, २००९

विठू !

क्रान्तिची ही अजून एक सहजसुंदर रचना. ह्याची चाल कशी वाटतेय ऐकून सांगा.

विठू

पुन्हा एकदा गवस विठू
रित्या अंगणी बरस विठू

दर्शन नाही सुगम तुझे
दुरून बघते कळस विठू

संतसंगती सदा घडो,
अता कुठे ते दिवस विठू ?

नित्य तुझा सहवास हवा
तुलाच करते नवस विठू

तुझ्या दयेचे अमृत दे,
जळते माझी तुळस विठू

घराकडे जा, नको करू
रखुमाईचा विरस विठू

कवयित्री: क्रान्ति


चाल इथे ऐका.

२ टिप्पण्या:

प्रकाश खाडिलकर म्हणाले...

पारंपारिक चाली येतात का?
ज्ञानेश्वरीच्या ओव्या, तुकारामाचे अभंग, भजनांच्या चाली तुमच्या आवाजात ध्वनी मुद्रित करून ठेवा. आता त्या लुप्त होत चालल्या आहेत.

मी अत्त्यानंद म्हणाले...

प्रकाशराव,अभंगाच्या वगैरे पारंपारिक चाली ऐकण्यासाठी आपल्याला कोणत्याही भजन मंडळींचा कार्यक्रम ऐकावा लागेल. खूपच छान छान चाली असतात त्यांच्या आणि त्या चाली गाणार्‍या बुवांचे आवाजही मस्त असतात. ह्या चाली परंपरेने चालत आलेल्या आहेत. ह्यापुढेही ही परंपरा सुरुच राहील..ह्याबद्दल माझ्या मनात शंका नाही.

माझ्या बाबतीत इतकेच सांगता येईल की कुणाचीच नक्कल करायची नाही ह्या भावनेतून ह्या चाली रचायचा मी माझ्या अल्प मतीने प्रयत्न करतोय .
कितपत जमतंय हे आपल्यासारख्या रसिकांनीच ठरवायचंय.